Maha Tripura Sundari Hrudayam – śrī mahātripurasundarī hr̥dayam
vandē sindūravarṇābhaṁ vāmōrunyastavallabham |
ikṣuvāridhimadhyasthamibharājamukhaṁ mahaḥ || 1 ||
gambhīralaharījālagaṇḍūṣitadigantaraḥ |
avyānmāmamr̥tāmbhōdhiranarghamaṇisamyutaḥ || 2 ||
madhyē tasya manōhāri madhupāravamēduram |
prasūnavigalanmādhvīpravāhaparipūritam || 3 ||
kinnarīgānamēdasvi krīḍākandaradanturam |
kāñcanadrumadhūlībhiḥ kalpitāvālavaddrumam || 4 ||
mugdhakōkilanikvāṇamukharīkr̥tadiṅmukham |
mandāratarusantānamañjarīpuñjapiñjaram || 5 ||
nāsānāḍindhamasmēranamērusumasaurabham |
āvr̥ntahasitāmbhōjadīvyadvibhramadīrghikam || 6 ||
mandaraktaśukīdaṣṭamātuluṅgaphalānvitam |
savidhasyandamānābhrasaritkallōlavēllitam || 7 ||
prasūnapāṁsusaurabhyapaśyatōharamārutam |
vakulaprasavākīrṇaṁ vandē nandanakānanam || 8 ||
tanmadhyē nīpakāntāraṁ taraṇistambhakāraṇam |
madhupālivimardālikalakvāṇakarambitam || 9 ||
kōmalaśvaśanādhūtakōrakōdgatadhūlibhiḥ |
sindūritanabhōmārgaṁ cintitaṁ siddhavandibhiḥ || 10 ||
madhyē tasya marunmārgalambimāṇikyatōraṇam |
śāṇōllikhitavaidūryakluptasālasamākulam || 11 ||
māṇikyastambhapaṭalīmayūkhavyāptadiktaṭam |
pañcaviṁśatisālāḍhyāṁ namāmi nagarōttamam || 12 ||
tatra cintāmaṇigr̥haṁ taḍitkōṭisamujjvalam |
nīlōtpalasamākīrṇaniryūhaśatasaṅkulam || 13 ||
sōmakāntamaṇikluptasōpānōdbhāsivēdikam |
candraśālācaratkētusamālīḍhanabhōntaram || 14 ||
gārutmatamaṇīkluptamaṇḍapavyūhamaṇḍitam |
nityasēvāparāmartyanibiḍadvāraśōbhitam || 15 ||
adhiṣṭhitaṁ dvārapālairasitōmarapāṇibhiḥ |
namāmi nākanārīṇāṁ sāndrasaṅgītamēduram || 16 ||
tanmadhyē taruṇārkābhaṁ taptakāñcananirmitam |
śakrādimaddvārapālaiḥ santataṁ parivēṣṭitam || 17 ||
catuṣṣaṣṭimahāvidyākalābhirabhisaṁvr̥tam |
rakṣitaṁ yōginībr̥ndai ratnasiṁhāsanaṁ bhajē || 18 ||
madhyē tasya marutsēvyaṁ caturdvārasamujjvalam |
caturasratrirēkhāḍhyāṁ cārutrivalayānvitam || 19 ||
kalādalasamāyuktaṁ kanadaṣṭadalānvitam |
caturdaśārasahitaṁ daśāradvitayānvitam || 20 ||
aṣṭakōṇayutaṁ divyamagnikōṇavirājitam |
yōgibhiḥ pūjitaṁ yōgiyōginīgaṇasēvitam || 21 ||
sarvaduḥkhapraśamanaṁ sarvavyādhivināśanam |
viṣajvaraharaṁ puṇyaṁ vividhāpadvidāraṇam || 22 ||
sarvadāridryaśamanaṁ sarvabhūpālamōhanam |
āśābhipūrakaṁ divyamarcakānāmaharniśam || 23 ||
aṣṭādaśasumarmāḍhyaṁ caturviṁśatisandhinam |
śrīmadbindugr̥hōpētaṁ śrīcakraṁ praṇamāmyaham || 24 ||
tatraiva baindavasthānē taruṇādityasannibham |
pāśāṅkuśadhanurbāṇapariṣkr̥takarāmbujam || 25 ||
pūrṇēndubimbavadanaṁ phullapaṅkajalōcanam |
kusumāyudhaśr̥ṅgārakōdaṇḍakuṭilabhruvam || 26 ||
cārucandrakalōpētaṁ candanāgururūṣitam |
mandasmitamadhūkālikiñjalkitamukhāmbujam || 27 ||
pāṭīratilakōdbhāsiphālasthalamanōharam |
anēkakōṭikandarpalāvaṇyamaruṇādharam || 28 ||
tapanīyāṁśukadharaṁ tāruṇyaśrīniṣēvitam |
kāmēśvaramahaṁ vandē kāmitārthapradaṁ nr̥ṇām || 29 ||
tasyāṅkamadhyamāsīnāṁ taptahāṭakasannibhām |
māṇikyamukuṭacchāyāmaṇḍalāruṇadiṅmukhām || 30 ||
kalavēṇīkanatphullakahlārakusumōjjvalām |
uḍurājakr̥tōttaṁsāmutpalaśyāmalālakām || 31 ||
caturthīcandrasacchātraphālarēkhāpariṣkr̥tām |
kastūrītilakārūḍhakamanīyalalantikām || 32 ||
bhrūlatāśrīparābhūtapuṣpāyudhaśarāsanām |
nālīkadaladāyādanayanatrayaśōbhitām || 33 ||
karuṇārasasampūrṇakaṭākṣahasitōjjvalām |
bhavyamuktāmaṇicārunāsāmauktikavēṣṭitām || 34 ||
kapōlayugalīnr̥tyakarṇatāṭaṅkaśōbhitām |
māṇikyavālīyugalīmayūkhāruṇadiṅmukhām || 35 ||
paripakvasubimbābhāpāṭalādharapallavām |
mañjulādharaparvasthamandasmitamanōharām || 36 ||
dvikhaṇḍadvijarājābhagaṇḍadvitayamaṇḍitām |
daraphullalasadgaṇḍadhavalāpūritānanām || 37 ||
pacēlimēndusuṣamāpāṭaccaramukhaprabhām |
kandharākāntihasitakambubimbōkaḍambarām || 38 ||
kastūrīkardamāśyāmakandharāmūlakandarām |
vāmāṁsaśikharōpāntavyālambighanavēṇikām || 39 ||
mr̥ṇālakāṇḍadāyādamr̥dubāhucatuṣṭayām |
maṇikēyūrayugalīmayūkhāruṇavigrahām || 40 ||
karamūlalasadratnakaṅkaṇakvāṇapēśalām |
karakāntisamādhūtakalpānōkahapallavām || 41 ||
padmarāgōrmikāśrēṇibhāsurāṅgulipālikām |
puṇḍrakōdaṇḍapuṣpāstrapāśāṅkuśalasatkarām || 42 ||
taptakāñcanakumbhābhastanamaṇḍalamaṇḍitām |
ghanastanataṭīkluptakāśmīrakṣōdapāṭalām || 43 ||
kūlaṅkaṣakucasphāratārahāravirājitām |
cārukausumbhakūrpāsacchannavakṣōjamaṇḍalām || 44 ||
navanīlaghanaśyāmarōmarājivirājitām |
lāvaṇyasāgarāvartanibhanābhivibhūṣitām || 45 ||
ḍimbhamuṣṭitalagrāhyamadhyayaṣṭimanōharām |
nitambamaṇḍalābhōganikvaṇanmaṇimēkhalām || 46 ||
sandhyāruṇakṣaumapaṭīsañchannajaghanasthalām |
ghanōrukāntihasitakadalīkāṇḍavibhramām || 47 ||
jānusampuṭakadvandvajitamāṇikyadarpaṇām |
jaṅghāyugalasaundaryavijitānaṅgakāhalām || 48 ||
prapadacchāyasantānajitaprācīnakacchapām |
nīrajāsanakōṭīranighr̥ṣṭacaraṇāmbujām || 49 ||
pādaśōbhāparābhūtapākāritarupallavām |
caraṇāmbhōjaśiñjānamaṇimañjīramañjulām || 50 ||
vibudhēndravadhūtsaṅgavinyastapadapallavām |
pārśvasthabhāratīlakṣmīpāṇicāmaravījitām || 51 ||
puratō nākanārīṇāṁ paśyantīṁ nr̥ttamadbhutam |
bhrūlatāñcalasambhūtapuṣpāyudhaparamparām || 52 ||
pratyagrayauvanōnmattapariphullavilōcanām |
tāmrōṣṭhīṁ taralāpāṅgīṁ sunāsāṁ sundarasmitām || 53 ||
caturarthadhruvōdārāṁ cāmpēyōdgandhikuntalām |
madhusnapitamr̥dvīkamadhurālāpapēśalām || 54 ||
śivāṁ ṣōḍaśavārṣīkāṁ śivāṅkatalavāsinīm |
cinmayīṁ hr̥dayāmbhōjē cintayējjāpakōttamaḥ || 55 ||
iti tripurasundaryā hr̥dayaṁ sarvakāmadam |
sarvadāridryaśamanaṁ sarvasampatpradaṁ nr̥ṇām || 56 ||
tāpajvarārtiśamanaṁ taruṇījanamōhanam |
mahāviṣaharaṁ puṇyaṁ māṅgalyakaramadbhutam || 57 ||
apamr̥tyuharaṁ divyamāyuṣyaśrīkaraṁ param |
apavargaikanilayamavanīpālavaśyadam || 58 ||
paṭhati dhyānaratnaṁ yaḥ prātaḥ sāyamatandritaḥ |
na viṣādaiḥ sa ca pumān prāpnōti bhuvanatrayam || 59 ||
iti śrīmahātripurasundarīhr̥dayaṁ sampūrṇam |
